ادبح بنفسك

السلام عليكم
كل سنة وانتو طيبين ..

أكيد كلنا بنسمع عن موضوع الدبح ده كل سنة .. هو سنة مؤكدة للقادر .. من بعد صلاة العيد حتى اخر أيام التشريق .. يوم 13 ذي الحجة يعني ..

في الدبح كمية فوائد كتير جدا .. فمثلا اختزان الدم بداخل جسم الدبيحة يفسد اللحم و قد يؤدي لانتشار الامراض في لحم الدبيحة .. ذلك لان الجهاز المناعي قد توقف .. والدم -بما يحمل- لا زال في كل قطعة لحم .. فكيف عالج الاسلام هذا الموضوع ؟؟
النحر .. بانك تدبح الخروف مثلا .. بس مش لحد الاخر .. ماتقطعش راسه .. فيظل المخ متصلا -عصبيا- عن طريق النخاع الشوكي بالجسم كله .. فلما حضرتك تقطع العروق بتاعت الرقبة .. يحصل طبعا نقص في مدد الدماء الواصلة للمخ .. فيبدأ المخ بارسال اشارات أو رسائل عصبية سريعة لكافة اطراف واعضاء الجسم " انجدوني بما عندكم من الدماء" ... طبعا الرسالة دي بتوصل عن طريق النخاع الشوكي اللي جوة فقرات الرقبة التي لم تقطع ..
عندها تبدأ اعضاء الجسم بضخ ما عندها من الدماء .. في سبيل نجدة المخ .. و طبعا .. الدم كله هايطلع من الرقبة مكان ما دبحت .. و بعد ثوان معدودة .. تكون قد صفيت كل الدماء من أعضاء الجسم ..

فسبحان الله !
قارن الحالة دي بالصعق الكهربي .. الغربي !

كمان نلاقي من السنة النبوية ..اراحة الذبيحة .. و استخدام سكينا حادا .. رفقا بالذبيحة ... و عدم ذبح حيوان امام عيون اخوه .. كل ده ليه أثر كبير على جودة اللحم !
لان ارهاق الحيوان او تعبه قبل الذبح .. يؤدي لحرق طاقته .. التي تكون عادة في شكل جليكوجين (نشأ حيواني) .. ده بيقلل القيمة الغذائية بتاعت اللحم .. كمان بيؤثر على جودته !

نرجع لعنوان التدوينة .. "ادبح بنفسك" .. دي بجد حاجة مهمة جدا ومن السنة ... هات ولادك .. اخواتك .. خليهم يتفرجوا ..
عملية الدبح نفسها مش عايزة عضلات خالص .. ولا مجهود .. مش لازم انت اللي تسلخ و تقطع كمان .. بس على الاقل .. سمي وكبر وادبح بس ..

للاسف كتير مننا واخداهم الدنيا بزينتها .. و بينسوا مدى ضعف الانسان .. فلما بيلاقي الدبيحة بتتفتح .. و يتحول الحيوان المتحرك النشيط لبضع لفات جرائد فيها لحمة .. بجد .. النظرة للحياة بتتغير ... انا لا اساوي إلا بعض الكيلوهات من اللحم إذا لم يكن لي أعمالا صالحة ... انا سأتحول يوما ما إلى رقاقات من اللحم النتن بداخله فتافيت عظم ... ولن يبقى لي سوى أعمالي وأثرها على الناس ..
ساعتها .. بجد .. هاتحس انك خروف لو ماشتغلتش لله .. معزة لو ماكنتش عبد لله .. طور لو ماعملتش طفرة للأمة !

السلام عليكم