الاقصى
من أفضل ما كتبت >> مفهوم الدولة الدينية - تجربتي مع الجيش - فرق الموت الشيعية - يحبهم ويحبونه - خاطرة دعوية

ديسمبر 13، 2006

تجربتي مع الجيش


السلام عليكم

اولا أحمد الله حمدا كثيرا ..وأقر بأن الانسان (خاصة انا) خُلق هلوعا .. اللهم اصلح قلوبنا ..
بخصوص موضوع الجيش بتاعي .. انا فعلا مش عايز اتكلم عن حاجات شخصية .. لكن احب انقل تجربة ايمانية عشتها لمدة تزيد عن اسبوع ..صعب ان انساها ..

بداية .. وقبل التقديم للجيش .. انا كنت مطمئن تماما .. انا عندي مشاكل صحية بسيطة .. في اغلب الظن انها ستكون سبب لاعفائي من الخدمة العسكرية .. ويبدو اني كنت مقصرا في موضوع التوكل .. عبادة يبدو انها غابت عن قلبي منذ مشروع التخرج من بضعة اشهر ..

قدمت ورقي مع كل الناس في اوائل نوفمبر .. ثم تقدمت للكشف الطبي .. كان المشهد هناك اشبه بدكتور بيطري بيتطمن على البهايم بتاعته .. مش بيكشف عليها حتى .. يعني كان فيه واحد يوم الكشف عنده مشاكل مع صمام القلب .. والولد جايب اشعات وروشتات علاج .. لكن الدكتور ماقتنعش .. حتى اني شكيت في لحظة انه دكتور اصلا .. في ذلك اليوم أخذت اولى الصدمات العلاجية الايمانية حين نظر الدكتور الى الشهادات الطبية التي قدمتها له وانا واثق من نفسي ... نظر نظرة الحائر .. كأنه اول مرة يسمع عن مرضي .. ثم هز رأسه مستهزئا .. "بقى عندك التهاب نفروزي ياخويا؟؟" ..فشرحت له اعراضه .. مع بعض التهويل .. ثم كتب بالخط العريض: لائق !

أخدت الصدمة .. استشرت اولى الخبرة .. قالولي اني انتظر يوم الارجاء ..لان اغلب الناس بياخدوا تأجيل .. الا عدد قليل جدا يقعوا في الخدمة .. يتم اخيارهم حسب تاريخ الميلاد .. ونظرا لاني اكبر من زملائي سنا .. مواليد 83 .. فكنت متطمن جدا .. لانهم لو اخذوا كام واحد .. اكيد هايكونوا من 84 .. وقلت بلاش اعمل تظلم طبي .. انا كده كده ان شاء الله طالع .. لكن بدأ يساورني بعض الخوف ..

جاء يوم الارجا .. لم يتم اختيار ايا من مواليد 84 .. و تم اخيار مواليد شهرين من 83 .. وكنت منهم .. لم اصدق نفسي .. انتابني شعورغريب .. بين الرضا بالقضاء .. والرغبة الملحة في تغيير هذا الوضع .. ساعتها كتبت تدوينتي : دخول الجيش: نعمة أم نقمة؟ .. التي بدا بها حزني وقلقي ..

حاولت بعد يوم الخبر بدء اجراءات تظلم طبي .. و حضرت الواسطة المتينة .. لكن للاسف .. ماينفعش قبل يوم كشف الهيئة .. يجب الانتظار ... سبحان الله .. يهيئني ربي .. حتى انكسر اليه كما يحب .. حتى يكون يقيني في الله وحده .. ويخلو من كل من سواه .. فله الحمد كله ..

جاء يوم كشف الهيئة .. وفيه كشف طبي .. اكثر رقيا من الاول .. لكنه لا يرقى أيضا للادمية ! .. عرضت تقاريري الطبية على طبيب الباطنة الذي بدا محترما جدا .. و بدأ يكلمني ويسمع مني .. تلك النعمة التي يفتقدها كل من يدخل الجيش .. كله اوامر .. كله زعيق .. ضجيج .. الا هذا الطبيب .. فلك الحمد يا ربي .. بدا الطبيب مهتما بي .. ثم قال: " تعالى بكرة .. ليك مستشار كلى ! " .. فطرت فرحا .. وجئت في صبيحة اليوم التالي .. الساعة 8 .. "فين يا جماعة مستشار الكلى؟ " .. ولا مجيب .. حتى ظهرت جعورة ملحقة بعسكري برتبة صول صائحة: " اقعد مكانك واحنا هاننادي عليك! " ... رديت في انكسار: حاضر !

جائني الرد بعد كثرة الحاح عند الساعة 11 .. "مافيش عندنا مستشار كلى اصلا" ... نعم .. هذه هي الحقيقة .. كلمت الواسطة .. بعتني لرئيس الوحدة .. حكيت له الحكاية .. قالي نعمل فحص موجات (سونار) ..وتحاليل .. ومش عارف ايه .. ساعتها حسيت انه بيبعتني في سكة اللي يروح مايوصلش .. قلتله: "لا ..المرض اللي عندي مش بيظهر بالحاجات دي .. وانا معايا تقاريري وتحاليلي .. فقط أوصلني باستشاري كلى او باطنة" .. قالي طاب تعالى يوم السبت ونشوف .. وكان يومها يوم الاربع .. تاني مرة .. سبحان الله .. ربنا يديني فرصة لاصلاح قلبي .. وجهاد نفسي وسياستها الى ما يحبه ويرضاه .. فاجتهدت في القيام والقران الودعاء .. حتى يوم السبت ..

ذهبت في الصباح الباكر بعد صلاة الصبح .. وذهبت مباشرة لرئيس الوحدة .. قالي انت هاتعمل موجات !! كنت ساعتها نفسي اديله بالبونية .. " يا حضرة العميد انا اللي عندي مش هايبان بالسونار" .. نظر الى مستغربا .. " اقصد بالموجات" .. فبدأ هو الاخر كمرؤوسيه يفتح عليا الجعورة .. ويستهزئ .. فرددت في انكسار للمرة العشرين: "حاضر" ..

و جلست في انتظار طبيب الموجات المختص .. ساعة ... ساعتين .. وكلما سألت الصول عن الطبيب المنتظر فتح على نفس الجعورة الاولانية: " اقعد مكانك واحنا هاننادي عليك! " .. جلست من الساعة 8 وحتى الواحدة ظهرا .. خلاص .. ريقي نشف من الدعاء .. والاستغفار .. وقراءة القران .. فقررت الرحيل .. دخلت لرئيس الوحدة .. وقولتله ان الطبيب المختص بالموجات تأخر جدا .. واني سارجع في اليوم التالي لاستشاري الباطنة .. وان .. لم اكمل كلامي حتى انفتحت عليا نوبة هستيرية من التريقة والزعيق .. والتهديد بان هذا تخلفا عن التجنيد .. وانه سوف تنزل بي اللعنات من السماء اذا انصرفت ..رجعت وانا اردد كلمة "حاضر" بصوت مبحوح .. و بقيت منتظرا ..

جاء طبيب الموجات ..الساعة 1 ونص .. الحمد لله .. بدا كرجل انيق ومهذب .. انتظرت دوري حتى دخلت عليه .. قدمت له ما كان معي من تقارير وسونارات سابقة .. نظر وعينيه تشككان في كل كلمة اقولها .. بدأ السونار .. وسبحان الله .. مجرد وضع جهاز السونار .. فصاح: " الورق اللي معاك بيقول انك طبيعي وكداب كمان .. بس انا شايف ان حجم الكلي مش طبيعي" ... فقلت في نفسي سبحان ربي الحكيم !

انتظار ساعة .. ثم جاء الصول ليعلن لنا نتيجة الموجات ... و قد ادركت وقتها ان الكلمة ترجع لطبيب الموجات . وان بيده قرار لائق أو غير لائق ! .. وانا الذي كنت ارفضه .. سبحان الله ..كم الانسان جاهل عجول .. ينظر الى المشاهد ويغفل عن تدبير الله له ..
أخذ ينادي على الاسماء .. "فلان الفلاني .. لائق ..روح يا حبيبي على بيتكو ! " ...واخذت ادعو .. ربي نجني من القوم الظالمين .. الى ان جاء اسمي .. " غير لائق ..استنى شوية " .. ففرحت فرحا شديدا .. وجلست في مقعد في طرف الغرفة .. واضعا رأسي بين كفوفي .. وجلست احمد الله واثني عليه .. وابكي له شكرا وفرحا بما انعم الله به علي !

.. قليل من الانتظار ثم سمحوا لي بالانصراف .. ساعتها كنت صلاة العصر .. دخلت مسجد صغير .. و والله .. لم اصلى في حياتي صلاة العصر بهذا اللذة ... وهذه المتعة بين يدي ربي القائل " وإذا سألك عبادي عني فإني قريب أجيب دعوة الداع إذا دعان" .. الله .. ربي استجاب لي.. لى انا شخصيا .. ربي اعطاني سؤلي وبغيتي ..والله شعور يعدل الدنيا مجتمعة !
ياسلاااام .. ده ربنا كريم اوي ... رحيم اوي .. ودود اوي اوي اوي ..

عند هذه اللحظة بدأت ادرك معنى ما مررت به طيلة اسبوعين .. لقد كانت تلك التجربة اشبه بقرصة ودن ..
• أوعى تعتمد على الظروف وتغفل عن الله
• مهما ملكت من اسباب .. فالتوكل هو الأساس
• الخير ان كتبه الله لي، سيأتيني رغما عني .. بالطريق الذي يختاره الله !
• لا يرد القضاء الا الدعاء !

رجعت في اليوم التالي .. كان مطلوب مني بصمة صباع .. و انا الان في انتظار اللجنة العسكرية العليا التي ستصدر ان شاء الله قرار اعفائي من الخدمة العسكرية لاني غير لائق طبيا ..

المقصود يا جماعة من كل القصة دي هي الاربع نقاط اللي اتعلمتهم .. بجد مهمين جدا لكل الناس .. لازم القلب يفضل متعلق بالله .. بشكل دائم .. وهي دي منزلة الاحسان في العبادة ..!

اللهم أصلح قلوبنا .. وأحسن أعمالنا .. وبلغنا –مما يرضيك- أمالنا
أمين


23 تعليقات:

hussein يقول...

ربنا يكرمك يا أخ طارق
حكايتك بجد مؤثره جدا
وربنا يهدي الجميع

غير معرف يقول...

سبحان الله يا اخى
هوا انتا تقعد تدعى متدخلشى الجيش وتشوه صورته كدا
وتمزج كلامك بالايمانيات ليه
عاوز تنصر دينك واساس النصرة الصبر
وكمنتش صابر على اللى انتا فيه
وعلشان متتكلمش انا دخلت الجيش وكنت فى وحدة مش دخلت الجيش من منازلهم
ليه كدا
عاوز تجاهد وخايف من 12 شهر فى وحدة عسكريه مش حرب
ازاى بس سبحان الله

الديب يقول...

السلام عليكم ..

جزاك الله خيرا يا سحس

--------

الاخ انونيموس ..
كان نفسي تكتب اسمك عشان اعرف انا باكلم مين .. المهم ..

انت بتقول انك دخلت الجيش ..طاب اسمحلي اسألك:

حلقت دقنك ولا لا؟
كام فرض ضيعته اثناء الخدمة؟
كام مرة اتسب الدين قدام وماعملتش حاجة؟
كام مرة اتشتمت بأمك وكل اللي عملته انك قولت تمام يافندم؟

انا مش بلومك لو اخدت مواقف سلبية في الاسئلة .. لأنك مضطر تتشتم وتحلق دقنك وتبقى مطيع في كل الاوامر العسكرية حتى لو خالفت دين الله

بتقول صبر ..

الواحد بيصبر على قضية يبتغي بها وجه الله .. يصبر في الجهاد اللي بجد .. مش يصبر على خدمة نظام بيكرهه اصلا!

اخيرا
اسأل الله الهدايا لنا جميعا

Mohamed يقول...

السلام عليكم
انا قرأت رسالتك الاولي بعد الجيش و كان عنوانها الجيش نقمة ام نقمة من وجهة نظرك اللي حسيتها و قت ما قريت رسالتك
في الحقيقة انا كنت عاوز اكتب ان الجيش بالنسبة لنا هو نقمة مجردة من النعم خاصة لو كنت ظابط لكن ماكنتش اقدر اقولك كده وقتها مراعاة للحالة النفسية السيئة اللي اعتقد انك كنت عايشها لمدة اسبوعين لكن اقدر اقولك دلوقتي ان المشكلة اللي انت مريت بيها دي في صالحك مش ضدك لان ربنا بيختبر الانسان التقي مش العكس .اعتقد دلوقتي انك بتبص للدنيا بنظرة سعيده جدا اكتر من اي واحد اخد تاجيل يوم الارجا و دي نعمة تانية ربنا كرمك بيها
مرة تانية مبرررررررررروك يا طارق علي الخروج من الجحيم ده
ســــــــــــــــلام

غير معرف يقول...

سؤال ملوش علاقة بحاجة
الديب
انت أحمد عادل الديب من امبابة عشان بشبه عليك

Abdelnasser يقول...
أزال المؤلف هذا التعليق.
AmR يقول...

أه ...
قرائتي لهذه التدوينة جعلتني أفكر في مصيري الذي سألقاه بعد عدة سنوات !!

فعلاً هتبقى تجربة لا أريد التفكير فيها أصلاً !!!

غير معرف يقول...

السلام عليكم

انا مشرف برنامج إلى صلاتي



ابحث عن مدونات اسلامية

من يعرف يتصل بي

www.ela-salaty.com/contactus.html


و يا طارق, حاول تحضر دروس علم و خلي بالك المسلم كيس فطن

يوسف يقول...

ألف مبروك ياباشا..
ونفض للي بيقولك الصبر علي الجهاد والهجص ده كله..

آخر مكان ممكن تجاهد فيه هو الجيش..

وعقبال كده ما يلغو التجنيد الإجباري زي بقيت دول البني آدمين إللي بتفهم..

الديب يقول...

السلام عليكم

محمد ..
الله يبارك فيك .. وعندك حق . ماكانش لازم تقولي حاجة ساعتها..لاني كنت مخنوق فعلا

أنونيموس
لا انا مش ده

عبد الناصر
جزاك الله خيرا وربنا يوفقك

عمرو
ربنا يستر عليك .. بس اتطمن .. دفعتي كانت 570 ..تقريبا مادخلش منهم غير 10 .. و انا كنت منهم .. الحمد لله انه نجاني

مشرف برنامج الى صلاتي
شرفت المدونة يا باشا .. ان شاء الله انا وبعض المدونين بنجمع المدونات وبنصنفهم .. هابعتلك النتائج قريب ان شاء الله .. وجزاك الله خيرا على النصيحة

غير معرف يقول...

ارمالصراحة مش عارف اقولك مبروك ..خاصة بعد ما ذكرته من اللي بيحصل جوه الجيش..أو أقول يا خسارة لأني أظن ان الجيش فيه فرصة ولو ضئيلة انك تتعلم حاجات حاليا صعب جدا نتعلمها براه


بس مبروك بجد الموقف الايماني ده ... وربنا بيحبك بجد ..لانه لم يكن كذلك ما ابتلاك هكذا وأشعرك بالحاجة اليه ولتركك ولنفسك دون ان يبالي بك

الصارم الحاسم

حائر في دنيا الله يقول...

أومال مين هيخدم الوطن
وهيحارب
ويحرر البلد
ييييه قصدي هيبقى يحرر

إذا كان لا أحد يريد دخول الجيش إلا مرغما وأنا ايضا لا أريد الدخول

ومحدش يقوللي نستورد صينين يدافعوا عن البلد

عموما
الحمد لله

وأعانك وأعاننا الله
مع تحياتي

شــــمـس الديـن يقول...

اقدر الان اترك تعليقي بقبل مطمئن ...لان خدمة النت دخلت تاني

الحمد لله ..
الف الف مبروك انك فلت من الجيش ... و كان فضل الله عليك عظيما ,

لو الانسان نظر بتأمل لحالة و حياتة سيجد ان الله يقف معه كثيرا ...علينا ان تستخدم هذا الوقت في خالص طاعة الله

و الف مبروك المرة التانية

.....
بس بجد تساؤل الاخ حائر مهم , من اللي هيدافع عن البلد ؟؟؟؟

الديب يقول...

السلام عليكم

اخي حائر
اختي شمس ..

التساؤل انا جاوبت عليه ضمنيا في التدوينة .. لما نبني البلد نبقى نحميها ..

دلوقتي حاميها حراميها .. فماينفعش نقف مع حاميها !

و نورتوا المدونة
:)

غير معرف يقول...

سبخان الله الرحيم.. اللهم اجعلنا عبيد احسان لا عبيد امتحان
ساعات ربنا بيقا عاوز الانسان يرجع له وبيبقا عاوز يسمع صوته فيبتليه عشان يفوق ويحس بالتقصير
قيل فى الاثر: قال احدهم دخلت لله من باب الصدقة فوجدته ملئا ..و من باب الصلاة فوجدته ملئا.. ومن باب الصيام فوجدته ملئا..ولكنى دخلت من باب الذل والانكسار فلم أجد عليه أحد
... مبروك على الاعفا ونفع الله بى وبكم Ms:Emy

أروى الطويل يقول...

لولوللىىىىىىىىىىىى انا بنت الحمد لله مع ان الجيش اصلاح وتهذيب
والجيش للجدعان
بس الف الف مبرووك الاعفاء

الكابتن وائل يقول...

انت شخص محترم
ربنا يكرمك ويهدينا جميعا

Mohamed Meshref يقول...

You remind me with my experience as well :)

@مجهول & شــــمـس الديـن & حائر:

What protection you're talking about?!!
Is driving the car for the officer's wife considered fighting for your country?!!

Or delivering his kids to school?!

Or may be when you're an engineer is making applications for big officers sake and for making them more money?!!

What fighting you're talking about?!

I am sorry to say this, but you're living in a big dream which I don't hope that you wake up from it and see the actual truth!

شهدى يقول...

انا هسمع الارجاء بعد بكرة الاحد الموافق 15/3/2009
اليوم دة يا جماعه انا بعتبره من اشهر ايام حياتى يعنى مثلا زى يوم ميلادى
لان اليوم دة يا جماعه بيحدد مصيرك يا انت داخل الجيش وهتبقى من جنود مصر الاقوياء(هاهاهاهووو) او انك مش هتبقى من ضمنهم( يسمع من بقى ربنا)
وعلى فكرة والله العظيم انا مش فارقه معايا داخل ولا مش داخل
اهو سنتين الواحد يقضيهم بالطول ولا بالعرض
هيعدوا يعنى هيعدوا
بس اللى فارق معايا ان فى حاجات فى دماغى كنت منظمها بس الجيش بيخليك السنتين دول زى البيت الوقف

وعلى العموم مبروك يا برنس على الاعفاء

وعقبااااااااااااااالنا


وفكك من شرف الدفاع عن مصر ام على احم احم قصدى مصر ام الدنيا

غير معرف يقول...

سبحان الله أخي ..
ليه كل الفرحه دى انك هتاخد شهادة من القوات المسلحه انك غير لائق طبيا, عشان مش تخدم في الجيش المصري اللى هو مهما كان أقرب أسكال الجهاد لانك هتكون من القوات المرابطه لحماية أرضك و أهلك
أنا شاب زيك مواليد 83 وداخل الجيش البردو بس مش كنت أتمنى ان اطلع غير لائق لسبب طبي و أنا شاب تجنيد ( اذا بليتم فاستتروا )
أحمد الله على مرضك و ادعو الله أن يرفع عنك البلاء .
بجد مهما كان الجيش المصري فيه من أخطاء بس في الاخر
الجنديه دي شرف و رجوله ووسام انك خدمت بلدك و أهلك مش عار تبعد عنو و تهرب بيه عشان انت مريض
وربنا يرفع عنك المرش و عن المسلمين أجمعين

الديب يقول...

أخي الغير معروف

جزاك الله خيرا ..
اقرأ تدوينتي السابقة هنا ففيها الرد على تساؤلاتك ان شاء الله

واحد من الناس يقول...

مدونه جميله وموضوع حلو
واسلوبك في الكتابه كويس فعلا

اتمنى تزورني في مدونتي عن اجراءات التجنيد وتقوللي رأيك فيها

http://eltagnid.blogspot.com

غير معرف يقول...

شكل الموضوع قديم اوي :)

مش عارف انت موجود لسه ولا لا بس انا مفروض ان شاء الله داخل الجيش كمان نص شهر :(( مش عارف بقي هتبقي ايه الدنيا في الوقت لحالي....

بفكر اقدم تظلم طبي انا اتجبست اثر تمزق اربطه...تفتكر تنفع ولا ايه :)

الله المستعان