دخول الجيش: نعمة أم نقمة
السلام عليكم
الحمد لله على كل حال ونعوذ به من حال أهل النار ..
لما جاءني خبر اختياري للخدمة في الجيش .. حمدت الله على قضاءه .. ورضيت به .. لعل فيه الخير .. وعجبا لأمر المؤمن، فإن أمره كله له خير: إن أصابته سراء شكر فكان خيرا له، وإن أصابته ضراء صبر فكان خيرا له.
لكن يبقى السؤال: هل الخدمة في الجيش سراء أم ضراء ؟ يعني أشكر ولا أصبر ؟
طول النهار في تفكير مستمر ..فلما انظر الى نصف الكوب المليان .. أقول دي فرصة كويسة .. الواحد هايبقى فاضي وقت كبير.. ممكن يخلص حفظ القرآن .. ممكن يعمل ماجستير .. ممكن يقرا كتب بالعبيط .. ممكن يبقى فيه فرصة لشغل بارت تايم ..
لكن لما انظر للنصف الفارغ .. أقول تأخر في حياتي العملية .. تأخير الزواج .. نزول مستوايا المهني بشكل ملحوظ وذلك لنسيان تفاصيل ما تم دراسته .. وتغيير أخلاقي ..نظرا لكم لسماعي قاموس الشتائم بشكل يومي في الجيش .. وده على أحسن حال إن لم يوجه لي شخصيا !
نصحنى أحد أصدقائي اني لازم أحتسب الوقت ده كرباط في سبيل الله ..انا باحمى البلد .. و باخدمها .. وده في حد ذاته له ثواب كبير ..!
إلا اني مش قادر أحس بالموضوع ده بصراحة ..
يعني مثلا ممكن الواحد يشوف حارس أمن بيحرس شركة .. فيللا .. عمارة .. لكن عمري ما شفت واحد بيحرس خرابة .. زريبة .. !
البلد محتاجة للي يبنيها .. يصلحها .. محتاجة حرية .. عدل .. مساواه .. تعاون بين أطيافها ..صناعة .. اعلام نظيف .. و ستين حاجة تانية .. لما نبقى نعرق و نعمل الستين حاجة دول .. ساعتها هانحب نضحي عشان نحمي بلدنا .. ساعتها مش هاكتب تدوينة عما أشعر به ...لانه هايكون معروف للجميع.. تم اختياري لخدمة أمي !
أرجع وأقول لنفسي .. بص للنص المليان .. وقت كتير ممكن استغلاله .. غيرك بيخلص عمره و مابيلحقش يعمل حاجة من اللي هاتعمله ...
أرجع وأقول .. ده انا كده باحرس النظام الذي طالما كرهته .. بادعم جيش أيده في ايد الاسرائيليين ! .. أقوم أرد على نفسي .. انا كده في جيش مصر .. الذي أخبر عنه رسول الله بأنه خير أجناد الارض... انا باحمي الارض .. مش النظام ... لا لا .. ارد على نفسي .. مصر مش خايفة من حد .. لانها بترضي كل جيرانها الاقوياء .. يعني مافيش لزوم من الجيش أصلا .. وافضل حاجة ممكن اعملها في الجيش هي الاعمال الكتابية لانى من كليات عليا ..
ثم اسأل نفسي.. هل الكوب ممتلئ للنصف فعلا ؟ ولا دول مجرد حبة مياه في القعر ؟؟ ولا هو فعلا ممتلئ قرب أخره لكني انا من يهول الصعاب ؟؟ .. مش عارف !
أما عن الفتاوي .. فسمعت من الشيخ صفوت حجازي حرمانية الهروب من الجيش .. لانه بيدافع عن أرض مسلمة .. كمان سمعت من الشيخ الالباني العكس تماما ..لانه نظام لا يحكم بالاسلام و انت كده بتدعمه !
و بعد تعب في التفكير .. قررت اني اكتب تلك الخواطر .. التي تاخذ عقلي كبندول الساعة .. حبة يمين و حبة شمال .. و مش راضية ترسي على وضع ... و اشارككم بها .. لعلكم تفيدوني ..
عايز ارائكم بجد .. لعل بندول افكاري يستقر .. وعلى كل حال .. فالحمد لله !
السلام عليكم
9 تعليقات:
:(
السلام عليكم و رحمة الله و بركاتة
اخي الفاضل
لقد احزنني حقا سماع هذا الخبر منك ...
ستدخل الجيش ... اي انك ستنقطع عن العالم الخارجي , بما فيه النت , و عن العالم النظيف ايضا
اتمني من الله عز و جل ان تستطيع ان تدخل كعسكري و ليس ضابط , حتي لا تضيع 3 سنوات من عمرك
هو طبعا قدر الله و ماشاء فعل ...و لن انصحك بالنظر للكوب من النصف الممتلئ لانه لا يوجد كوب اساسا (فقد تمت خصخصه شركة ياسين بتاعة الزجاج و الاكواب ) و لكن ساقول لك وجة نظري و ارجو ان تكون ذات فائدة
ان كنت في عون الله سيكون الله دائما في عونك ...قد يكون الجيش تأخير - نظريا - عن بدء الحياة العملية الحقيقية , و لكن كل شئ في حياتنا هذه نسبي , فكر في ان الجيش سيكسبك خبرات لن تستطيع ان تحصل عليها الا في هذا المجال و هذا قد يكون نوع من الاعداد المستقبلي لشصيتك ... فما يدريك عما يخبئة الغد لك...
اتدري ؟؟
صاحب الصيدليات التي اتمرن بها دخلالجيش و اصبح ضابطاً , و هو خريك 96 اي منذ عشر سنوات و قال لي انه لم يتمرن قبل هذا الوقت ابدا و بدأ العمل في اكتوبر من العام نفسة ثم تأخر بسبب الجيش هذا ... و انظر له الان , لقد تزوج و انجب فتاة و فتي و اصبح عندة عدة صيدليات ... كل هذا في سبع سنوات ...
نصيبك لم يحيد عنك ... و كل شئ مكتوب ( طبعا نحن نأخذ بالاسباب و لكن ان لم نستطع تأجيل مثل هذا الامر فلابد من التعايش معة
ان كنت تخشئ تأخر الزواج , فلا تقلق لم يعد هذا الامر بالمقلق للفتيان فمن المتقبل الان الزوج الكبير في السن ... و لربما ايضا ستكون فرصة جيدة لك كي تنضج مشاعرك و شعورك بالسؤولية و تصبح قادر لتحمل مسؤولية زواج ... و ان كنت تستطيع ان تخطب قبل ان تلتحق بالجيش فيا حبز , و لن لم تستطع فان شاء الله نصيبك و قدرك موجود
المهم الاستفادة القصوي من هذا الوقت الممنوح لك ... ممكن تستثمرة في اتمام حف القران الكريم , ممكن ان تستزيد من معارفك بالقراءة و المطالعة في تخصصك اثناء وجودك هناك ... لو كان مكان تجنيدك به منفذ للانتر نت فهذا افضل ... و لكن في وسط ذلك حافظ علي نفسك قدر الامكان و تذكر ان المؤمن ليس بفاحش ولا لعان
و ساختم ما قولتة بما معناه ما قالة الرسول ...ان امر المؤمن كلة خير , ان اصابتة سراء حمد و شكر فكان خيرا له ,و ان اصابتة ضراء احتسب و صبر فكان خيرا له
ربنا يبارك لك و يحفظك
في حفظ الله :)
سلامو عليكو
والله يابني مش عارف!
لغاية يوم الإرجا أنا مكنتش عارف أنا عايز أدخل الجيش ولا لأ..
بجد والله! أنا كنت لما آجي أدعي أقول يارب ....ومبقاش عارف أكمل أقول يارب أدخل الجيش ولا يارب مدخلش الجيش..
جيت في الآخر وقلت يارب وفقني للي فيه الخير..
أما بقي بخصوص نسيان العلم والكلام ده فمش لازم, واحد صاحبي أخد الجيش بتاعه في قطاع "المعلومات والمش عارف إيه كده" وكان شغال بتاع IT في الجيش..
وعليكم السلام، ورحمة الله، وبركاته
الواقع يا أخ ديب أنني لدي إجابة بسيطة على سؤالك، هل الخدمة في الجيش المصري نعمة أم نقمة؟
الواقع، أن الجيش المصري كان نقمة على مصر وأهلها منذ حوالي 55 عاما، ولذلك، فإن الخدمة في الجيش المصري هي نقمة يعاقب بها الله المنافقين من المسلمين، وقانا الله من شرهم وكيدهم.
أحب أيضا أن أشكرك لأنك أثبت ليا حاجة أنا كنت شاكك فيها من زمان، وهي أن حفظ القرآن هي شغلانة الناس الفاضية.
أرجو أيضا أن تسلملي على أمك لما يتم اختيارك لخدمتها.
السلام عليكم ورحمة الله وبركاته
وعليكم السلام يا شمس
جزاكي الله خيرا ..
-----------
يوسف ..
ربنا يقدم اللي فيه الخير
أمين
-----------
متمرد مصري
انا كاتب ردي مخصوص عشان ارد عليك
لا
حفظ القران مش شغلانة الناس الفاضية .. وانما شغلانة أهل القران الذين هم أهل الله وخاصته كما جاء بالحديث
الحمد لله .. طول فترة المدرسة والثانوية العامة وكلية الهندسة ..وانا شغال حفظ للقران
فاضلي كام جزء وأختم .. فدول ممكن يبقوا سهلين في الجيش .. انا قلت أكمل الحفظ .. مش ابدأ الحفظ ..
وعمر ما القران كان السلعة الرخيصة!
على كل حال..كنت انتظر اخلاقا افضل لمعلقي المدونة
السلام عليكم
السلام عليكم و رحمة الله و بركات
الجيش مضيعة للوقت
اهدار اموال
ممكن تستفاد بلوقت اللي ضايع في الجيش في دراسات عليا
أو في شغل تتمرن فيه علي المهرات الأكاديمية اللي اكتسبتها في الجامعة
المشكلة انه الواحد في الجيش مش بيتمرن في المجال اللي درس فيه و ان اتمرن بتكون حاجة في مستوى اولي و تاني سنة في الكلية خصوصاً في مجال علوم الحاسبات اللي بجد الواحد منهم ربنا يكون في عونه لو لبس تلاتة ضابط
و من الأخر الجيش مالوش لازمة.
و طاطي طاطي انت في وطن ديموقراطي
الميزة الوحيدة هى حكم النفس على النفس .. بص .. ايام الجيش ..كنت ااتمنى حد يقوللى يا دكتور بس علشان يهون عليا الذل و امتهان النفس .. و ما ادراك ان يتحكم فيك .. شخص عنده عقد نفسيه .. و كلاكيع فى دماغه ...
الصبر .. ثم الصبر .. هى دى الميزة الوحيدة فى الجيش ...
طبعاً نقمة
ده انت كده بتقرب من أزبل فئة
اسأل الله لك السلامة
وربنا يفك جيشك
احيلك لموضوع قديم كتبتة بعد ان اجتزت فترة 7 سنوات نقاهة من فكرة دخول الجيش
اسمة
يوم مشينا بالسليب في صحراء الهايكستب
http://anaga3an.blogspot.com/2006/08/blog-post_28.html
بسم الله الرحمن الرحيم
من وجهه نظرى ياجماعه ان الجيش ايام زمان كان حاجة ودلوقتى بقى حاجة تانية
الجيش دلوقتى بقى اللى يدخله تتهان كرامته ويتقل بيه على الاخر
طيب دة لية ؟؟؟\
واحد مريض نفسيا او اجتماعيا ييجي ويتنطط عليك ويزعق ويشخط فيك ويضربك ويشتمك وانت احسن منة فى كل حاجة!!!!
احسن منة ماديا واجتماعيا وثقافيا
ومش بس كدة توصل الشتم والسب الى الام التى كرمها الله
\فكيف يكون الجيش نعمة؟؟؟؟؟
من اخلاق الاسلام احترام الاخرين
فهل يوجد داخل الجيش احترام للاخرين؟
حاجة كمان
الجيش دة معمول للدفاع عن مصر ضد اى خطر مش معمول عشان ندخل نذل الناس والشباب ونضيع وقتهم
طيب احنا لية مش سالنا نفسنا ليه الناس اللى بتفكر تهرب من الجيش دى فكرت تهرب او هربت
هقولكم على مثل او حاجة حصلت فعلا لاحد اصدقائى
كان هو الاخ الاكبر وعندة 3 اخوات اولاد وبنتين
ووالدة ووالدته ربنا يعطيهم الصحة
طبعا الظروف المعيشيه دلوقتى الواحد مش عايز يتكلم عنها لانها بجد شئ محزن ومؤسف ولو اتكلمنا عنها هيبقى دة موضوع خارج الاطار اللى بنتكلم فيه
المهم كان الشاب دة بيساعد اهله عشان يقدروا يعيشوا
ولما قدم طلب انه بيساعد والدة المريض على مصاريف البيت ولا حد سمع له كلام ولاحد صدق كلامة
دخل الجيش 3 سنوات
وياترى كان مبسوط جوة؟
بالطبع لا مكانش مبسوط عندة اخوات واب مريض يحتاج علاج ومتابعه وام لاحول لها ولا قوة فى وسط الزمن دة
حالتهم بقت سيئه جدا جدا والاب مرضه ذاد جدا عليه ولاحول ولا قوة الا بالله
المهم القصه طويله جدا وانا مش عايز اكملها لانها مؤسفه وحزينه جدا
خلاصه الكلام الجيش لو كان بكل احترام ولو اتعامل الجندى زى ما الاسلام قال عليه ان الجندى المصرى خير اجناد الارض
لكان يتمنى كل شاب مننا انه يدخل الجيش
ومكانش الموضوع اللى بنتكلم فيه دة اتفتح من الاساس
لكن لن اقوى سوى حسبى الله ونعم الوكيل فى كل ظالم
إرسال تعليق