شيخ الأزهر شاخ

السلام عليكم

يبدو ان معالي فضيلة الامام الاكبر قد شاخ .. ولم يعد قادرا على تمثيل الازهر ..اقصد التمثيل على محبي الأزهر .. ففضيلته اسهاماته معروفة .. وله بالغ الاثر في تغير أحوال الازهر .. ما علينا ..

المهم هو تلك المداخلة التليفونية التي طلبتها منه قناة الجزيرة للتعقيب على هدم طريق المغاربة التاريخي الاثري للمسجد الاقصى ..

تقريبا الشيخ كان لسة صاحي من النوم الساعة واحدة الظهر (اسمع طريقة كلامه) .. و مايعرفش حاجة عن المخاطر تجاه الأقصي (ده الامام الاكبر يا جماعة) .. وبدأ هو اللي يسأل المزيعة بدل ما يجاوب ..



تحياتي الى الشيخ رحمه الله !

معيدين في الهوا

السلام عليكم

منذ سنوات ونظام تعيين المعيدين في جامعة القاهرة كما هو .. في نهاية الترم الثاني تقوم مجالس الأقسام/ الكليات باختيار عدد معين من أوائل الدفعة لتعيينهم كمعيدين. وحسب حاجة كل سنة يتم تحديد العدد المراد تعيينه .. بعدها يتم ابلاغ ادارة الجامعة بأسماء المعيدين الجدد .. فيتم عمل درجة مهنية لكل منهم .. وتعيينهم ..

عادة ما تنتهي هذه القصة على شهر نوفمبر من كل عام .. فتجد المعيد يبدأ عمله بالتدريس في شهر سبتمبر بدون أجر لمدة اكثر من 3 أشهر .. لكنه يحتسب .. فهكذا كان النظام وهكذا سيكون .. و عند اصدار قرار التعيين في شهر نوفمبر غالبا ما يتم صرف مكافأة لهم .. حوالي 300 جنيه كده !

كما سمعنا عن نماذج عجيبة .. حيث تم طلب المعيد للتجنيد كضابط احتياط .. يعني هايلبس 3 سنين رغم ان المعيد لو انطلب بيبقى عسكري سنة واحدة .. لكن بدون قرار التعيين .. يضيع المعيدين !

رغم سوء النظام مع من يفترض انهم كريمة شباب مصر اللي على الوش ... فان الوضع كان محتملا .. حتى السنة الماضية ..
أما سنة 2006-2007 فبدأ التدريس في سبتمبر كعادته .. وبدأ المعيدين الجدد بغير تعيين كعادة الجدد .. فات 3 شهور ..و لسة قرار التعيين ماجاش ! .. كاد الترم الأول ان ينتهي ولم يتم صرف رواتبهم .. ولم يتم تعيينهم ..
ثم تم صرف 500 مكافأة عن تدريس الترم بحاله ! .. تقريبا الحكومة بتعامل التعليم بسعر الجملة .. المهم .. بدأ الترم الثاني .. بدون تعيين ايضا .. هذه أول مرة تحدث ..بدأ المعيدين الجدد ينتابهم القلق .. الوضع هايستمر لحد امتى ؟ ..لحد امتى هانشتغل باللوشي ؟ بدأ التصعيد .. ايه الحكاية ؟

حدث في قسمي اتصالات و رياضة (كلية الهندسة) ان اعلن المعيدين الجدد انهم مضربين .. لن يدرسوا ماداموا لم يتم تعيينهم و صرف رواتبهم .. فهم لا يطالبون بما فات .. وانما يطالبون بتعيينهم .. لكن لا عقل لمن تنادي !

جاءهم الرد من ادارة قسم اتصالات: لكم الحق في الاضراب طالما لا يتم صرف رواتبكم .. ولنا الحق في رفض تعيينكم طالما ستضربون عن التدريس !

خضع المعيدين .. و بدأ تدريس الترم الثاني (مع تخفيف عدد السكاشن عليهم) .. و ظلوا بلا تعيين .. لكنهم زادوا من ضغطهم على ادارة كلية الهندسة .. حتى عرفوا (بشكل غير رسمي) حقيقة الموضوع ..

الحكومة لا تريد تعيين معيدين في جامعة القاهرة هذا العام لتحديد عدد موظفيها !

وادارة كلية الهندسة تحاول الدعبسة في ملفاتها القديمة .. عن موظف مات مثلا ولم يتم الغاء درجته الوظيفية .. معيد سافر للخارج من زمن ولم يرجع.. فتقوم الكلية بفصله و تعيين المعيدين المعلقين بهذه الدرجة الوظيفية .. !

طبعا .. الدعبسة دي هاتاخد وقت .. و عدد الدرجات الوظيفية قد لا تكفي كل المعيدين الجدد .. و يبقى الحال كم هو عليه ..

فهل أعلنت الحكومة افلاسها ؟
ام هي سياسة قذرة لتشجيع التعليم الخاص ؟
وان كان .. فهل لتشجيع الجامعات الخاصة نضيق الخناق على الجامعات الحكومية ؟

تعالوا نشوف أخبار موقع جامعة القاهرة:
- مافيش اي خبر عن الموضوع ده
- خبر تعلنه الجامعة المفلسة: اتفاقية بين المجلس الاعلي للجامعات وشركة ميكروسوفت حيث تسمح الاتفاقية بتوزيع برامج الشركة (نسخ اصلية) علي اعضاء هيئة التدريس بالجامعة و طلاب الجامعة
- كمان خبر تعلنه الجامعة المفلسة :وقع عقد التعاون بين الجامعة والشركة المصرية للاتصالات لتطوير وحدة الطوارئ والستقبال وشبكة الحاسب الآلي بمستشفى الأطفال الجامعي التخصصي (الياباني)

انا اتهيألي .. لو الحكومة عايزة توفر مصاريفها ..ممكن تخف شوية من مصاريف الجيش .. التي باتت تنحصر في مصايف جديدة .. نوادي جديدة .. صالات افراح مالية البلد .. رحلات حج وعمرة مدعمة ..
ده جيش ايه ده ؟؟؟!!

أو ممكن تخف شوية من حفلات التليفزيون ..فالواحدة منهم تتكلف اكتر من 10 ملايين جنيه .. ممكن تسحب "شوية" من العربيات اللي بتتوزع على الوزراء .. والفلوس اللي بيوزعوها على أعضاء مجلش الشعب الغير اخوانيين !

خف مصاريف اي حاجة ... كله إلا التعليم !

Cairo ICT 2007

السلام عليكم

قبل ما ندخل في موضوع معرض ICT .. احب اقول اني عملت فرع من مدونتي ليكون متخصص في تدويناتي التكنولوجية .. مدونة الديب تك .. ده لان في كتير تدويناتي ليها الطابع ده وطبعا هي غير مناسبة للناس كلها .. والتخصص اكيد افضل ..

فلو انت مهتم بالحاجات دي .. ياريت تضيف http://eldeebs-tech.blogspot.com عندك ..سواء في ديبو ريدر او قائمة المفضلة ..
كمان هاتلاقي اخر ما اكتب في هذا الفرع موجود في اللستة اللي على اليمين ..

و بما ان تدوينة الـ ICT مهمة .. فحبيت انقل جزء منها:
--------------------------------------------------------

من كام يوم كنت في قاعة المؤتمرات باحضر المعرض السنوي لتكنولوجيا المعلومات والاتصالات، والحقيقة انبهرت من المعروض هناك ..

عدد مهول من الشركات العالمية .. وكل واحدة عاملة بوث (مكان لعرض خدمات ومنتجات الشركة) مكلفاه الاف ان ماكانش ملايين .. ايوة ملايين .. البوث بتاع شركة اتصالات (شركة المحمول الثالثة) سمعت انها مكلفة البوث بتاعها حوالي مليون ونص دولار .. هما كتير ..بس لو شفته .. هاتصدق !

انا بادون الكلام ده ليه ؟ .. بصراحة علشان باعتبر الاحداث اللي من النوعية دي لازم الناس يهتموا بيها اكتر .. يمكن نحس على دمنا و نبدأ أو نحاول نلحق بركب التكنولوجيا ... الذي فاتنا من منتصف القرن التاسع عشر .. امتى ده ؟؟ .. بيفكرك بحاجة التاريخ ده ؟؟ .. ده تاريخ الثورة الصناعية في أوربا لما اخترعوا آلات البخار .. والقطار و كده يعني ..

المهم..
المعرض اسمه ICT =Information and Communications Technologies بيقام سنويا في قاعة المؤتمرات، الغرض منه استعراض اخر ما عند اكبر شركات الاتصالات والمعلومات في مصر والخارج (والخارج دي تحتها خطوط كتير، لان مصر تقريبا مافيهاش جديد).. كمان بيبقي فيه منتديات (forums) بتبقى عبارة عن محاضرة ويليها أسئلة ..

كل شركة بتبقى حاجزة مساحة بتعرض فيها افضل ما لديها من منتجات وخدمات .. والسنة دي كانت شركة اتصالات الاماراتية هي الافضل على الاطلاق .. فده يعتبر اول ظهور لشركة المحمول التالتة امام الجمهور المصري ..

فحسب موقع المعرض، تعتبر الخدمات/المنتجات التالية هي أهم الفرقعات:
- الاتصالات الاماراتية: الشركة التالتة للمحمول في مصر
- فودافون: خدمات الجيل الثالث للمحمول ( 3G)
- مايكروسوفت:ويندوز فيستا
- انتل : كور 2 ديو (ده بروسيسور جديد من انتل .. جامد يعني بس اسرائيلي!)
- باناسونيك: أكبر شاشة بلازمة في العالم 103 بوصة (شكلها يهبل)
- تي اي داتا مع ايه ار تي: خدمة نقل القنوات الفضائية عبر الانترنت

باقي التدوينة فيها تفاصيل وصور وفيديوهات خش وشوف باقي الموضوع ..

بس على كل حال .. دي احلى فيديو صورتها هناك: من بوث اتصالات



السلام عليكم
;)

الامريكان أغبى الشعوب

السلام عليكم

بدون مقدمات ..
يبدوا ان ما نعانيه ..نحن المصريين من قلة المستوى الثقافي عند أكثرنا..يبدو وكأنه داء عالمي في اكثر الشعوب.. حتى الامريكان وإن بدوا أكثر الشعوب تقدما ..

وفي رأيي الشخصي ... ان انتشار التلفزيون في البيوت أكسب الشعوب مزيدا من البلاهة والكثير من اللاوعي .. واصبحت وسائل الاعلام سلاحا مهما في أيدي قلة تتحكم في عقول الشعوب .. فكان طبيعي جدا .. اننا نوصل لما نحن عليه ..اقصد جميع الشعوب..

نضحك مع بعض على الأمريكان

باختصار .. في راجل بيمشي يسأل الناس في شوارع أمريكا أسئلة عادية جدا .. لكن الاجابات هي اللي مش عادية خالص .. رغم انهم اكثر الشعوب استخداما للانترنت .. وعندهم افضل الجامعات .. واكبر المعلماء ... الخ



لازم يبقى عندك فلاش علشان تقدر تتفرج على الفيديو


زوادة قبل ما نختم التدوينة:
أغلب الأمريكان بيشوفوا العالم في مخهم كده (بجد مش تهريج) .. !


السلام عليكم
:)