ويندوز فيستا 5600 بالصور

السلام عليكم
بعد يومين من الداونلود المستمر .. نزل أخيرا نسخة الزمالة من ويندوز فيستا
Windows Vista RC1 Build 5600 x64 Edition
و اليكم بعض الصور ..
دي طبعا أول صورة .. بعد الانستال .. و بعد ما الويندوز خد وقت كتير في البوت بتاعه ..

الحقيقة كانت بدايتي مش مفرحة .. يادوب بعد نص دقيقة برنامج الاكسبلورر بتاع الويندوز ضرب .. واداني الرسالة دي .. هي صحيح رسالة شيك أوي و بتتحرك .. لكنه يفضل أرور !


طبعا أول حاجة الواحد بيبص عليها هي الستارت مينيو ..

الزرار اللي شكله باور ده .. أول ما دسته قام عامل sleep سريع قوي .. و لما فتحت الجهاز تاني .. في كام ثانية بس كانت الويندوز قايمة ... المهم ان ده مش زرار الشات داون ! .. انما الشات داون و الريستارت و الهايبرنيت ..كل دول من السهم الصغير اللي جنب القفل ..
طاب ايه بقى القفل ..؟؟ ويندوز بدأت تقلد اللينوكس .. ده lock بحيث لما تقوم من الجهاز و مش عايز تطفيه ولا عايز حد يلعبلك فيه .. تعمله لوك !
دي صورة تانية برده للستارت مينيو ..

بعد كده بصيت على الديسك توب .. لاقيت فيه زرار جديد جنب الزرار التقليدي ShowDesktop ..

ده بالظبط زي ما بتدوس Alt+Tab للانتقال ما بين الويندوهات المفتوحة .. لما تدوس الزرار بيظهرلك برده مربع صغير في نص الشاشة كده ..


نخش بقى على My Computer ..و تلاقي سيادتك ان منظر الفولدرات اتغير تماما .. بجد .. مايكروسوفت اتنظفت قوي ..

و لما تدخل فولدر بتاع صور .. هاتلاقي ثامنيلز .. عادي .. بس اللي مش عادي انك ممكن تغير حجمهم لو عايز .. حركة صايعة برده .. تحسب لاونكل جيتس !

نيجي بقى على قصص النتوورك .. انا بالنسبة لي لما كنت باحب اشوف مين معايا على النتوورك .. كانتالويندوز اكس بي بتهنج أو بتقفش كده .. لحد ما تقوللي مين على النتوورك .. مع فيستا الوضع مختلف تماما .. زائد ان الويندوز اكتشفت ان فيه أكتر من راوتر .. العلم نور برده .. !

لو دققت في الصورة اللي فاتت هاتلاقي زرار اسمه 'Add a wireless device' .. دي خاصية جديدة لسة تحت التطوير شوية .. لكن فيستا بتدعمها .. الغرض منها انك ممكن توصل كاميرا او برنتر مثلا عن طريق الواي فاي .. و لدواعي الامن (حلوة الكلمة دي ) بيتم اضافة الجهاز على النتوورك عن طريق دنجل يو اس بي او رقم سري خاص .. ما علينا ..
جيت بقى افتح الانترنت .. طبعا نترنت اكسبلورر 7 .. شكله كويس .. بس لسة ماستعملتوش .. لكن الحمد لله .. فيه Rss اخيرا .. و تابات ..و نبات .. وكده يعني !
بسبب التنافس – العداء يعني – بين مايكروسوف و جوجل .. تلاقي سيادتك الصفحة الرئيسية في فيستا هي صفحة البحث الجديدة بتاعت مايكروسوفت

حاولت اشغل حاجة بالميديا بلاير .. الحقيقة ماعجبنيش .. بالظبط زي اخواته اللي قبل كده .. بس عمل حركة مش ظريفة .. انه دخل على النت لوحده و جابلي حبة ألبومات و أغاني جديدة .. بقى ده كلام ؟! .. كمان لاحظت ان أغلب ال Visualizations على شكل نجمة اسرائيل .. عشان كده مش هاحطله صورة .
بس اللي حلو بجد .. ال Windows Media Center ده اللي بينظملك الصور .. بيعرض دي في دي ..بيسجل من كارت الديش أو التليفزيون ..و حاجات من النوع ده ..

بعد كده .. جربت أشغل جيمز .. بالمناسبة .. انا لسة ما صطبتش كارت الشاشة ... بس على غير المتوقع اللعب اشتغلت .. جربت Fifa WorldCup 2006 و لعبة تانية عبيطة .. الاتنين اشتغلوا ..
أخر حاجة بقى .. من اعماق الكونترول بانل .. في أوبشن بيقيم أداء جهازك .. و يديله سكور .. و ممكن تقارن نفسك أونلاين .. بس مانصحكش .. لانك هاتحس ان الكومبيوتر بتاعك أخره ان بتاع الروبابيكيا يقبله كهدية ! .. كمان ممكن يعملك ريبورت عن حالة جهازك .. Reliability and Performance Monitor ده بقى هايجيبلك مصارين الكومبيوتر اللي عمرك ما شفتها ..
طيب :: ازاي تجيب سورس الويندوز فيستا .. اتهيألي هاتلاقيها على مواقع التورنت بس خد بالك من رقم النسخة .. Build 5600 ..دي اخر واحدة .. لانك هاتلاقي نسخ كتير أوي قبلها .. برده هاتحتاج سيريال .. معرفش بقى .. اتصرف انت .. انا عن نفسي .. اكمني يعني بيتا تستر في مايكروسوف .. هما اللي بعتولي لينكات التنزيل و باسوورد خاص بي ..
يا رب أكون أفادتكو .. و متعتكو ..
السلام عليكم

الأزهر نائم حتى اشعار أخر

السلام عليكم ..

كلمات وقحات قالها أبوهم بندكت .. و كلنا سمعنا الخبر .. و هو ليس بجديد .. ولا مدهش ..
فتاريخ الفاتيكان معروف .. ولستة مصائبة المتلتلة طويلة زيادة .. للاسف مدونتي لا تسعها !
لكن ممكن تقرا هنــــا عن بعضها

الغريب في الأمر .. ان الازهر و هو أحد –أو كان- أهم واجهات المسلمين نائم حتى اشعار اخر !
المشكلة ليست في قلة الطلبة أو ندرة الرجال .. لكن في فساد الرأس .. نعم .. العيب كله في شيخ الأزهر .. سيد بيه أوكيه ! ... طاب ازاي واحد زي ده مسك مكان حساس زي مشيخة الأزهر ؟ .. ازاي علماء أجلاء أفاضل يرضون بإمامة مثل سيد بيه أوكيه ؟؟

لمحة تاريخية ::منقولة من اسلام أونلاين

من الجدير بالذكر أن الأزهر يعتبر أعلى مؤسسة دينية في مصر، بل يعتبره الكثيرون أعلى مرجعية مؤسسية في العالم الإسلامي بأكمله، لذا فإن منصب شيخ الأزهر يأخذ أهمية كبرى وسط المناصب الدينية في العالم لمسلمي السنة.

وشيخ الأزهر كمنصب بدأ رسميا عام 1101 هـ ، وتولى منصب شيخ الأزهر حتى الآن اثنان وأربعون عالما، كان أولهم الشيخ محمد بن عبد الله الخراشي، وكان آخرهم الدكتور محمد سيد طنطاوي، الذي تولى المشيخة عام 1996م ويشغلها حتى كتابة هذه السطور.

ولقد كان تنصيب شيخ الأزهر يتم باتفاق شيوخ الجامع الأزهر وعلمائه فيما بينهم، فإذا أجمعوا أمرهم على اختيار أحد العلماء أخطروا ديوان أفندي سكرتير عام ديوان القاهرة، ليقوم بإبلاغ الباشا العثماني (الوالي) باسم الشيخ الجديد.

ومع تولي أسرة محمد علي الحكم في مصر، بدا التدخل واضحا في عملية اختيار شيخ الأزهر، ومع الجهود المبذولة لتطوير جامع الأزهر وإصلاحه، ظهرت جماعة كبار العلماء سنة (1239هـ = 1911 م ) في عهد المشيخة الثانية للشيخ سليم البشري، ونص قانون الأزهر وقتها على أن يكون اختيار شيخ الجامع الأزهر من بين جماعة كبار العلماء، وكان ذلك يضمن ما يجب أن يكون عليه شيخ الأزهر من العلم والمعرفة والسمعة وحسن الخلق.

وبصدور القانون رقم 103 لسنة 1961م الخاص بتطوير الأزهر، ألغيت هيئة كبار العلماء وحل محلها ما عرف باسم مجمع البحوث الإسلامية، ويتكون من خمسين عضوا على الأكثر، كان من بينهم في بداية نشأته ما لا يزيد عن عشرين من غير المصريين من كبار علماء العالم الإسلامي، ولا تسقط العضوية إلا بالوفاة أو الاستقالة أو العجز الصحي، والمجمع هو الذي يقرر إسقاط العضوية، وهو الذي يملأ المكان الشاغر بانتخاب أحد المرشحين، بالاقتراع السري وبأغلبية الأصوات، ويتم اختيار شيخ الأزهر من بينهم عن طريق رئيس جمهورية مصر العربية.

هي دي المشكلة .. أصبح الامام الاكبر موظف في الدولة ... قول يا شيخ بيان شجب .. يقول .. اسكت يا شيخنا شوية على مانشوف الوضع .. يسكت .. ابتسم شوية يا شيخ للكاميرا .. هيهههه !

المشكلة ان لازم نظام الانتخاب يرجع تاني .. و ده مش رأيي .. ده أراء علماء أزهريين كبار .. زي الدكتور عبد العظيم المطعني و الدكتور عبد الصبور شاهين ... وعلل الدكتور عبد العظيم المطعني (منقول من اسلام أونلاين)

رأيه القائل بضرورة انتخاب شيخ الأزهر بالتأكيد على أن الأزهر عندما كان شيخه بالانتخاب من بين علمائه كان بكامل حريته، وقال: "عندما صار منصب شيخ الأزهر بالتعيين دخل المرض في القلوب، وتأثر عمل الأزهر لدرجة أن خطابه أصبح معوجا، وأصبح الأزهري يحاسب نفسه ألف مرة على الكلمة التي سينطقها!" وأضاف المطعني: "إن من الضروري استقلال الأزهر عن سلطان الدولة، وجعل شيخ الأزهر بالانتخاب، على أن يشمل حق التصويت كل خريجي الأزهر من حملة الشهادات العليا، وألا يقتصر التصويت على مجمع البحوث الإسلامية وأساتذة الجامعة فقط، حتى لا تحدث مجاملات في الاختيار".

أختم بحديث صححه الألباني:
عن أبي هريرة قال: قال رسول الله صلى الله عليه وسلم " من تعلم علما مما يبتغى به وجه الله [ عزوجل ] لا يتعلمه إلا ليصيب به عرضا من الدنيا لم يجد عرف الجنة يوم القيامة " يعني ريحها

والله أعلم !