مغناطيس كبير

السلام عليكم ..

انتو عارفين ايه الفرق بين المغناطيس ..و قطعة من الحديد العادية؟
رغم ان المغناطيس برده مصنوع من حديد ... لكن ايه اللي بيخلي عنده قوة جذب او دفع ؟ ايه اللي بيخلي عنده تمييز بين الشمال و الجنوب؟؟ .. مع انه في الاخر.. قطعة من الحديد ..برده!
اقولكم ببساطة.. كل جزيء atom من مادة الحديد (او غيره من المواد) حواليه الكترونات بتلف.. و دورانها في حد ثاته بيعمل طاقة مغناطيسية (صغيرة جدا) في اتجاه معين..او ممكن نقول ان الدوران بيعمل متجه magnetic moment .. يعني الطاقة (او القوة) المغناطيسية دي ليها مقدار معين ..و بتؤثر في اتجاه معين..
لو كنا بنبص على قطعة من الحديد.. يبقى فيها ملايين الجزيئات.. يعني ملايين المتجهات(vector) المغناطيسية (كتير اوي بس كلها صغيرين اوي) .. لكن المتجهات دي منعكشين.. يعني كل واحد بيؤثر في اتجاه ..مع نفسه كده.. فلما تدرس قطعة الحديد ككل.. تلاقي ان محصلة الملايين دول كلهم .. تساوي صفر !
طيب.. و المغناطيس.. ما هو قطعة حديد برده.. امال ايه نظامه؟؟ .. نظامه ..انه متنظم.. يعني كل الجزيئات بتؤثر في اتجاه واحد.. اينعم كل جزيء ليه تأثير بسيط جدا.. لكن فيه ملايين الجزيئات في قطعة المغناطيس الصغيرة.. فتلاقي حضرتك.. ان ليهم تأثير.. و تأثير قوي كمان..
سين سؤال : هل ممكن تحويل حتة حديد .. لا قيمة لها الى مغناطيس له قوة و طاقة نافعة؟؟
جيم جواب: اكيد.. طاب ازاي..؟؟
بسيطة جدا.. انت تجيب مغناطيس قوي.. و تقعد تدعكه على حتة الحديدة في اتجاه واحد باحد اقطابه ..و بعد فترة.. تلاقي الحديدة هي كمان باقت مغناطيس.... ايه اللي حصل..؟؟
المغناطيس القوي.. ابو طاقة كبيرة.. استطاعت طاقته انه تلوح (او تعدل) جميع المتجهات المنعكشة في الحديدة اثناء الدعك..فبعد فترة.. اصبحت المتجهات (مقدار + اتجاه) المنعكشة.. كلها مترتبة .. و متستفة على تستيفة المغناطيس القوي.. و هي كمان باقت مغناطيس..بل و ممكن " تمغنط " حديدة تالتة !

يا عم صدعتنا .. عايز تقول ايه ؟؟
اظن الفكرة بدأت تبان ..
سيبوني اكمل هلوسة كمان شوية..
فاكرين ايام ثانوي..رياضة ثانوية عامة.. كنا بندرس المتجهات دي..
لو عندنا مثلا ..متجه أ بيشير ناحية الشمال ..ومتجه ب بيشير ناحية الشرق..
جيت انا بقى ..اشاور بصباعي الطويل ناحية الشمال الشرقى.. يا ترى انا وافقت اي واحد منهم ؟؟ هل شاورت في نفس اتجهه؟؟ ..
الحقيقة .. اني شاورت شوية في الشمال..و شية برده في الشرق.. يعني حاجة كده بين البينين...
فعلشان نحسب مركبة متجه (vector) بالنسبة لمركب تاني.. كنا بنعمل حاجة اسمها dot product كانت بتعتمد على الزاوية اللي ما بينهم.. لو كانت الزاوية صفر.. يبقوا بيشاوروا على نفس الاتجاه و متوافقين.. و لو الزاوية تسعين.. يبقى مافيش اي علاقة ما بينهم ..طاب لو الزاوية مية و تمانين؟؟ ... يبقوا عكس بعض !

خلاص .. هاخلصكو..
اللي عايز اقوله هو الاتي..
اي مجتمع ..عامل بالظبط زي قطعة الحديد .. التي لا فائدة منها ..و عايزة الدق كمان .. طالما ماهياش مغناطيس يمكن الاستفادة منه ..و الحقيقة ده تقريبا حالنا .. كل واحد في ناحية .. جهود مبعثرة .. حتى اصحاب الاتجاه الواحد .. ليسوا متطابقين.. اكيد الاختلاف من سنن البشر .. لكن عدم وجود تناسق على الاطلاق.. يكون محصلة المجتمع ..صفر.. و بالتالي ..يكون لا فائدة منه ..و يمكن الطامعين من استغلاله ..لانه لا طاقة له.. لا يجذب ..و لا يتنافر..
طاب و الحل..؟
محتاجين مغناطيس كبير !
يعني ايه ؟
يعني محتاجين مرجعية..كل الناس تتستف عليها ..و تظبط نفسها على ظبتيتها...
على فكرة.. نسيت اقول ..انك ممكن تمغنط الحديدة بدعكها بالمغناطيس من ناحية القطب الشمالي في اتجاه واحد.. و برده ممكن تدعكها بالقطب الجنوبي في عكس التجاه .. يعني فيه مساحة من الحرية و الاختلاف.. ده بالظبط اللي بيكون في المرجعية اللي احنا محتاجينها ..قسط من الخلاف.. لا يفسد.. بل لعل فيه مصلحة..
في مصر.. دايما كان الازهر هو المرجعية دي.. لكن ما اتأمم.. و اصبح شيخه الاكبر أوي..مجرد موظف.. يبقى طبيعي جدا تشوف الجزيئات منعكشة..اقصد الناس متفرقة..و جهودهم .. حصيلتها صفر ! فتلاقي حضرتك الليبرالي و الاشتراكي واليميني و الشمال و الوسطي.. حتى التحتي !

نقطة مهمة كمان احب اقولها ..
الحمد لله.. عندنا يقين ان النصر قادم..و كما قال سيدنا عمر بن الخطاب:

نحن قوم اعزنا الله بالاسلام فان ابتغينا العزة بغيره اذلنا الله

و طالما الطريق واضح قدامنا.. يبقى احنا عارفين المتجه ..متجه اسلامي..
و زي ما قلت .. بين كل متجهين زاوية..و برده لكل متجه مقدار ..او قوة..
اللي عايز اقوله .. ان الواحد ممكن يشوف شخص.. ايجابي جدا..و متحمس ..و نشيط ..و ليه تاثير ..وووو ,..يعني مقداره كبير..و قوي.. لكن يا ترى.. زاويته ايه مع الاسلام؟؟ لو الزاوية صفر.. يبقى في نفس الاتجاه ..و مساعيه محمودة...و بتقربنا من النصر.. طاب لو زاوية صغيرة.. يبقى بين البينين .. بينفع شوية ..و يضر شوية.. بس ده ممكن زاويته تبقى مية و تمانين ..يعني ضد الاسلام .. رغم انه نشيط و صاحب همة .. ساعتها واحد زي ده المفروض اننا نبصله بصة تانية...هو صحيح قوي و ليه نشاط.. بس للاسف.. عكس الاتجاه !

خلاصة القول::
عشان مجتمعنا يبقى صالح (اسمعوا ياللي بتجروا ورا الاصلاح) .. لازم كلنا نتفق على وجهة..و يكون لينا مرجعية ..مش كل واحد يطلع يجري في اتجاه ..و تبقى الحصيلة (رغم الجري و المشقة) ..للاسف صفر.
السلام عليكم