تأكد من صحة الاحاديث من الموبايل او الكمبيوتر

السلام عليكم

من فترة كبيرة وانا استخدم برنامج الشاملة والذي يحتوي على مئات الكتب في التفسير ومتون الحديث والفقه والسيرة .. الخ.
البرنامج قائم على داتابيز اكسيس 97 ويعمل تحت نظام ويندوز، ويمكن تنزيله من الينك المعطاه

أما لمستخدمي لينوكس فيوجد برنامج شبيه اسمه ثواب، يمكنه فتح نفس كتب الشاملة والتعامل معها، لمستخدمي فيدورا (او النسخة العربية منها: أعجوبة) فإليكم هذا الرابط .. ولمستخدمي أوبنتو (او نسختها الاسلامية) فإليكم هذا الرابط

الحقيقة اني لا استخدم لا الكمبيوتر ولا الموبايل في قراءة الكتب، وانما في البحث .. وخاصة البحث عن حديث.. فمثلا كتب الالباني لا تحوي متون (نصوص) الحديث فقط وانما تخريجها وبيان صحتها او ضعفها. منذ عدة اشهر وانا ابحث عن نسخة مبسطة أو مصغرة من هذا البرنامج الهائل لتشغيله على موبايلي .. والحقيقة اني لم اتمكن حتى الان من ايجاد برنامج يقوم بتلك المهمة

نقطة هامشية :: حد ممكن يشترك معايا في تصميم مثل هذا البرنامج على نظام سيمبيان؟

المهم .. اني وجدت بفضل الله ثم بعض الاخوة من منتدى فائدة حل لكنه غير كفئ!
يتم جمع الكتب في ملف نصي (تكست) واحد ثم فتحه والبحث به بواسطة اي محرر نصي (text editor) .. لكن للاسف نجد النص العربي سيء الشكل (إن كان مقروءا) والبحث بطيء .. لكن هذه الطريقة . شغالة على الموبايل وخلاص!

لتنزيل برنامج المحرر النصي المناسب لموبايلك اذهب للمنتدي .. وانا انصح بان لا تقوم بتنزيل اي كتب غير مجموعة الالباني لانها محققة .. فيمكنك معرفة ان كان الحديث صحيحا او ضعيفا بسرعة .. لينك مجموعة الالباني .. كما انصح بفك ضغطها قبل التشغيل للحصول على سرعة افضل.

لموبايلات سيمبيان الجيل الثالث .. نزل برنامج QReader .. اللينك والشرح في المنتدى .. الا ان هناك بعض الضبطيات الاضافية يجب عملها ليتمكن البرنامج من عرض اللغة العربية بشكل مقروء:
Options >> Setting >> Language
Region = Middle Eastern
Charset = Arabic
Codepage = Mac
Test Direction = Right-to-Left

Options >> Setting >>Layout
Alignment = Center

أرجو من الجميع عدم ارسال ايميلات دعوية الا بعد التأكد من صحة الاحاديث التي بها
أرجو من الجميع الحفاظ على سنة النبي طاهرة بلا احاديث موضوعة .. او من نوعية خربش واكسب ... ديننا مش حبة تراتيل .. ومجموعة تسابيح وتيجي الملائكة تشيلك ع الجنة .. ألا إن سلعة الله غالية .. ألا ان سلعة الله الجنة

السلام عليكم

بلسانهم .. ماكدونالدز مسرطن

السلام عليكم ..


كنت في زيارة عمل للولايات المتحدة الامريكية ...
ولم اكن على يقين بأن ولاية كاليفورنيا تذبح البهائم .. فخفت أكل الميتة .. فكان الحل في أكل السمك ..
المهم .. اني لم أجد غير ماكدونالدز يبيع السمك الفيليه ..  وهناك لم يكن لي بد من انتهاك مبدأ المقاطعة ..

دخلت المطعم الواقع في شارع الكامينو ريال بمدينة بالو التو .. وهناك رأيت تحذيرا من كون بعض الاطعمة مسرطنة !!


طبعا .. قانون بعض الولايات بفرض تعليق متل هذه التحذيرات .. أما عندنا في مصر ..فلا اتوقع من ماكدونالدز تقديم طعاما افضل .. ولا تعليق اي تحذيرات!! فظننت ساعتها في نفسي انه يجب علي تصوير ونشر ما رأيت ..

و اقتربت أكثر .. (اضغط لتكبير الصور)

ويمكن ترجمتها للاتي

تحذير ::

 المواد الكيميائية التي تسبب السرطان ، أو العيوب الخلقية أو غيرها من الاضرار التناسلية قد تكون موجودة في الأطعمة والمشروبات التي تباع او تقدم هنا. 
البطاطس التي تم تحميرها ، مثل البطاطس المقلية ، تحتوي على acrylamide ، وهي مادة كيميائية معروفة لدى ولاية كاليفورنيا بأنها مسببة للسرطان.
الأغذية الأخرى التي نبيعها، مثل الهمبرغر، والبسكويت والقهوة تحتوي أيضا على acrylamide ، ولكن بتركيزات أقل من البطاطس المقلية. مادة Acrylamide لا تضاف على الأطعمة ، بل تتكون أثناء تحمير البطاطس وغيرها.
ادارة الغذاء والدواء الامريكية لم تنصح المواطنين بالتوقف عن اكل الاغذية التي تحتوي على تلك المادة

حقيقة ... لم افهم المراد من اخر جملة ..لكن لعل ماكدونالدز يريد الحفاظ على اخر ما يبقى من ماء وجهه .. فالمادة المذكورة لم يتم حظرها .. لكن معلوم سيء أثرها .. وعجبي!



السلام عليكم

مشغووول

السلام عليكم ..

باعتذر عن فتور تدويني رهيب اصابني الفترة اللي فاتت .. وشكله مكمل كمان فترة ..

أصلي هاتجوز اليومين دول ان شاء الله ..

محتاج دعواتكو جامد ..

اللي اداه بيمينه النجسة، أخده بشماله البطالة

السلام عليكم

نوع البنزين ---- سعره الحالي ---- سعره الجديد
90-------------- 130----------------175
92-------------- 140 ---------------185
95---------------- ؟ -----------------250

يعني نسبة الزيادة 34.62% للبنزين الـ 90

واللي الناس مش واخده بالها منه كمان: الزيادة الـ %30 بتاعت الراتب .. ده على الراتب الاساسي بس .. يعني مثلا: دكتور الجامعة اللي مرتبه 1500 جنيه، هاتلاقي مرتبه الاساسي 170 مثلا والباقي بدلات ومكافآت، فتكون نتيجة الزيادة 50 جنيه فقط وليس 450 كما هو متوقع .. لان الـ 30 % على الراتب الاساسي فقط .. وده النظام في جميع الوظائف الحكومية

يعني مش بس اللي اداه باليمين أخده بالشمال .. ده أخد أكتر منه بكتير .. واعتبره هدية الشعب ليه في عيد ميلاده !!

نصيحة لو عندك عربية او موتوسيكل: إلحق فوّل دلوقتي .. لان السعر الجديد غالبا هايتطبق من الساعة 12 بالليل النهاردة

السلام عليكم

صور من الاسراف الحكومي

السلام عليكم ..

طول عمرنا اعتدنا على رؤية السيارات " اللادا " -روسي- لنقل كبار موظفي الحكومة والعاملين بالجيش ..
طبعا انا مع تيسير عمل هؤلاء الرجل .. فهم القائمين على ادارة الدولة ..مع فرض حسن النية ..

وبما اننا دولة نامية .. فقيرة .. لا نجد قوت يومنا الا بطفح الكوتة .. فكان اكثر ما يتمناه رجل الدولة هو الانتقال من العربية اللادا .. الى سيارة جديدة من نوع شاهين .. محلية الصنع .. برده معقول .. واعتدنا تلك المناظر ..

لكن الفترة اللي فاتت .. بدأت الاحظ عكس الصورة تماما .. سيارات المرسيدس لم تعد مقصورة على الوزراء والسفراء .. قاعات الافراح والنوادي التابعة للجيش -مصروف عليها من ضرايبنا- اصبحت تنافس الفنادق الخمس نجوم ان لم تتعدها بالفعل ..

سيارات اللادا والشاهين .. لم تعد حلما لرجال الدولة الفقيرة ولا واقعا .. بل .. اصبحت الصورة كما بالاسفل ..


النوبيرا بتتكلم في 70 الف ..


العربية مليانة علب أكل من اغلى المحلات .. لابوار .. ياللا .. هي فلوس ابوهم؟!




اوتوبيس مكيف .. يا سلام .. سياحي .. وخلي بقية الناس تدعك في الاوتوبيسات العامة .. ماهو الشعب في خدمة الوطن .. اللي هو الحكومة يعني !

ايوة يا فندم .. شيروكي ... اشمعنى الحكومة مايركبوهاش يعني؟!

و ادي كمان واحدة ..
والله انا شفت اللي انقح منهم .. بس مش دايما بالحق اصورهم ..


الصورة دي من معرض ال " اي سي تي 2008" .. تكنولوجيا الاتصالات والمعلومات .. مش عارف وزارة الداخلية ايه علاقتها بيه علشان تأجر مكان بعشرات الالاف وتعرض عربياتها ؟؟ .. ياللا .. اللي معاه جنيه محيره .. يجيب حمام ويطيره !

..

صحيح الواحد بيفرح لما بيشوف بلده بتطور .. لكن لما يكون التطور اغلبه مظهري .. ويقتصر على طبقة ضيقة .. فده اللي بانتقده ..

اسمحولي اخدكو في جولة سريعة في القرية الذكية .. عشان ابين انا اقصد انهي نوع من الاسراف ..


طبعا .. ده واحد من مباني كتير -كلها جامدة كده- من المباني التابعة لوزارة الاتصالات .. وزارة غنية بتفرض اتاوة - ترخيص يعني بلغتهم- على شركات الموبايلات .. اللي هم بدورهم بيمصوا دمنا .. فمن حقهم يتشبرقوا ..

أعرف ان وزارة الاتصالات الرواتب بتاعتها مختلفة تماما عن بقية الوزارات .. يعني الموظف " القلة " اللي فيهم بياخدله فوق ال 2000 مستريح .. يعني اكتر من استاذ الجامعة ! .. اما الموظفين المتوسطين .. ففي حدود ال 4000 .. وبيوصلوا لاكتر من 20000 وانت طالع .. دي ارقام من جوة الوزارة .. مش تخميني يعني!



اوعي تفتكر ان ده متحف اللوفر في فرنسا .. ده أحلى بكتير .. مبنى صغير في القرية الذكية ... في كتير اكبر وأحلى منه !

بالحاجات دي .. ممكن نفهم ازاي أحمد نظيف كل شوية يطلع يقول ان اقتصادنا في الطالع ..

لكن باقية الناس :

اللهم استخدمنا لنصرة دينك .. وانقاذ عبيدك ..

- انا مش باحط علامات مائية على الصور .. لو نقلت الموضوع: قل انه من مدونة الديب -

السلام عليكم ...