الاقصى
من أفضل ما كتبت >> مفهوم الدولة الدينية - تجربتي مع الجيش - فرق الموت الشيعية - يحبهم ويحبونه - خاطرة دعوية

يوليو ٢٦، ٢٠٠٧

نظام الانترنت الجديد



السلام عليكم

من يومين ظهر خبر وكلام عن نظام جديد لتسعير الانترنت "فائك" السرعة في مصر ..وبدأ ناس كتير يعترضوا .. وناس بدأوا تصويتات .. لكن اغلب الناس مش واخدين بالهم من سبب الاعتراض .. او ليه النظام الجديد اسوأ رغم انه ارخص

على العموم .. الوزير قال ان النظام الجديد اختياري للي عايزه .. يعني مش أزمة تستحق شد الشعر
..

تعالوا نتكلم الاول .. هو ليه الانترنت (دي اس ال) بفلوس اصلا؟

أولا: هناك تكاليف مبدأية لتحديث السنترالات لتمكين فتح خط الدي اس ال على خط التليفون العادي
التكاليف دي قامت بها الدولة كخطوة لا بد منها لمواكبة العصر

ثانيا:تكاليف شراء أجهزة dslam التي تمكن من توصيل الانترنت بخطوط السنترال التي تم تحديثها
التكاليف دي تقوم بها شركات الانترنت ..كل على حدى

ثالثا: شراء باندويدث محدد من أحدى الشركات الموزعة الاساسية للانترنت .. بمعنى ..زي ما هي العلاقة بينك كمستخدم عايز حبة نت .. فبتروح تعمل اشتراك عند واحدة من الشركات ...
الشركات برده بيروحوا يعملوا اشتراك عند شركات رئيسية -أم- عشان ياخدوا منها انترنت باندويدث ..وكل شركة بيكون ليها احتياج على حسب زباينها .. يعني أغلب شركات الانترنت في مصر ما هم الا موزعين للخدمة .. ومالكين لاجهزة ال dslam ايضا .. أما الشركات الام فهم محدودين .. من 3-5 .. مش متأكد كام بالظبط
وطبعا .. الشركات الام بيدفعوا لصالح شركات أم برده خارج مصر لتوصيل مصر بالشبكة الدولية ..الانترنت .. على فكرة .. مصر كلها داخلة على الانترنت عن طريق انجلترا ..دي اول بلد قدامنا على خريطة الانترنت

طيب.. يبقى فيه تكاليف أولية .. تم دفعها خلاص .. تتمثل في تحديث شبكة التليفونات الارضية .. وشراء أجهزة dslam في السنترالات .. أما التكاليف الجارية ..فهي تتمثل في اشتراكات الانترنت بين الشركات الموزعة .. سواء داخل او خارج مصر .. والتكاليف دي أقل بكثير من "السعر القطاعي" اللي احنا يا مستخدمين بناخد بيه ..

من الاول كده وبهدوء .. هو ايه النظام القديم اصلا؟
الكلام مبدأيا على مشتركي الدي اس ال سرعة 256 كيلوبت بالثانية .. كغالب المشتركين ..

تعالوا نمثل توزيع الانترنت بخرطوم المياه.. عندنا حاجتين ..عرض الخرطوم . وده اللي بيحكم مستوى تدفق المياه ..أو بلغة الانترنت : الباندويدث بتاعك ..او سرعتك.. 256 ولا 512 ولا ميجا ولا اتنين ميجا

وعندنا حاجة كمان ...هي كمية المياه المنقولة ..يعني ممكن يكون الخرطوم عريض .. لكن المية مقطوعة!

النظام القديم بقى بيحدد عرض الخرطوم ..او سرعتك .. وقايلك ان المية هاتكون عندك عل طول ..أما النظام الجديد ..فبيحدد عرض الخرطوم .. وبيقولك انك بتسحب من خزان مية ممكن يخلص بعد شوية .. والمية تنقطع

تعالوا نحسب كده

:: على النظام القديم ::

سرعتك مثلا 256 كيلو بت بالثانية
دي طبعا سرعة الداونلو ..أما الابلود فبيكون ربع السرعة

افترض مثلا ان سرعة الداونلود الحقيقية هي 25 كيلوبايت بالثانية
<ده فرض واقعي وان كان السرعة النظرية يجب ان تكون 32 كيلوبايت بالثانية>

يعني سيادتك هاتنزل الميجا في 40 ثانية ..
يعني الدقيقة هاتنزل ميجا ونص
يعني الساعة هاتنزل 90 ميجا
يعني في اليوم هاتنزل 2160 ميجا
يعني تقريبا 2 جيجا في اليوم

يعني ..على النظام القديم ..لو سايب جهازك مفتوح وبينزل على طول .. ممكن توصل لـ 60 جيجا في الشهر .. وده بسعر 95 جنيه
وبكده انت بتاخد حقك تالت ومتلت ..وتكون الجيجا تنزيل واقفة عليك بحوالي جنيه ونص

:: على النظام الجديد ::
نفس السرعة .. يعني 256 كيلوبت بالثانية .. مع سرعة تنزيل واقعية برده 25 كيلوبايت بالثانية

لكن خزان المية محدود .. باتنين جيجا فقك في الشهر
يعني اللي كنت هاتنزله في يوم كحد اقصى .. اصبح هو الحد الاقصى في شهر

يعني الجيجا تقف بحوالي 22 جنيه
!!!

ودي هي النقطة اللي الناس معترضة عليها بشكل اساسي ..ان سعر وحدة التنزيل زاد حوالي 15 ضعف

هل النظام ده كويس لبعض الناس؟
نعم .. للي مالهومش في الداونلود ولا بيعملو ستريمنج لصوت او فيديو .. فالنظام ده يعتبر ارخص .. وبيقضي الغرض برده ..

هما عملوا النظام ده ليه؟
غالب ظني .. لتحجيم مشاركة الجيران في نفس اشتراك الدي اس ال ..يعني انا لو عندي اشتراك من النوع الجديد .. اكيد هارفض مشاركة جيراني ليا .. لانهم هايخلصوا الخزان المحدود بتاعي .. كمان السعر نزل .. وممكن ادفعه لوحدي ..انا مابقيتش محتاج فلوسهم

وأظن ان كلام الوزير عن النظام الجديد كونه اختياري .. اظن دي خطوة لفرضه وتعميمه على الناس لو نجحت .. ولا اظنه سينجح .. والعلم عند الله

اتهيألي الموضوع كده خلص .. واتغطى لحد صوابع رجليه؟
اي اسئلة؟
:)

السلام عليكم

يوليو ١٣، ٢٠٠٧

أفلا يعقلون :: من أجمل ما شاهدت


السلام عليكم ..

هالني الاتقان.. وروعة التصوير .. وسرعة الحوار
ونبل الفكرة


أعجبني هذا الفيلم القصير الذي يتناول في مدة لا تزيد عن 18 دقيقة بعض طرق الشيطان لوسوسة الناس .. والدخول على قلوبهم ... وكيق يكون الرد ليها ..

بشكل درامي متقن ..وبلغة عربية .. مصرية اللهجة .. تشاهدون هذا الفيلم الرائع :: أفلا تعقلون





بارك الله في من قام عليه
..

السلام عليكم

يوليو ١٠، ٢٠٠٧

عودة موقع إفحت


السلام عليكم

بعد اسبوعين من اللف بين السيرفرات

والمناكفة مع السكريبتات

ومحايلة الاكواد والباجات
(*)

تم استرجاع موقع افحت


ااه .. بالمناسبة
حد عنده اي اقتراحات للموقع؟
وايه تقييمك للموقع؟

ارجو مشاكرة الجميع .. فالموقع ملك جميع مدوني حملة "تدوين نظيف" ..

السلام عليكم
-----------------
(*)-Bug-
باجات جمع باج يعني مشكلة ما في الكود تؤدي لعدم عمل البرنامج بشكل صحيح
:)